RSL Spielbericht - Zweite Herren - SV Fortuna - 2019-04-07

K: "Unn - was meenste?"

H: "Also ich sache ja ma' so: Bei uns frieher hammr o ni gejammert, nur weil mir ni de bestn Blätze gehabt hamm, wie bei de Kadrmannschaftn; da musstmr o dursch. Und 'sch fands o gar ni so verkehrt, wasse heudde hamm hier so gespielt. Weil, so'n scheener, hoher unn weidr Ball hatt doch o sein Scharm, he?"

K: "'s war also 'n hibbsches Gegeigl?"

H: "Nu, hadd gefetzd! Also ich gugge mir ja gerne son Amaddeurfußball an hier in Leipzsch un da siehd mar ja de dollsten Dinge. Un außerdem war Forduna ja ma ne rische Adresse, he? Ham nämlich ma um de Deitsche Meesterschaft mitgespielt; s'is abor schon ä bissl her - inne zwansch'er Jahre odr so. Abor heudde wars eschentlisch reschd ruisch für de Gesamtsituation. Ich meen, kennste doch selbr o, dass bei so 'nr knappn Giste schnell ma een, zwe'e ehr duschn gehn. Bloß dor Schiri war eher eener von dr überläschderen Sorde. 's gab zwar hin un wiedr ma een Frustfoul - vor allm weil die Kleenen uff de Außn von dn Gonnewitzrn so fixe un wendsch warn wie de Hopplhasen. Die krieschste em nich so leicht zu packn, he? Bloß der 3-er von denen hadde ständisch de Pfoten am Geschner dranne - da kannste o ma schnell 'n Elfer krieschn, sachsch ma so. Un scheen fandsch, dass die een ganz in Rot underweschs warn, un die annern ganz in Grien - gonndmr die nämlich o bessr ausnandr haldn.“

K: "Abor wars Ergebnis da o gerechtfertschd?"

H: "Na also Schangzn gabs uf beedn Seidn. Inner 1. Halbzeit war Forduna ma vors Dor gekomm, als dr Dormann von de Sterne am Sechzehner rummachte - hammse abor ni genutzd un sinnlos dn Ball vorbeigekloppd. Un inner zweeten Halbzeit krischtn die in Rot 'nen Wahnsinnspass vom geschnerischen 14-er indn Lauf neigespielt - nur will dr Forduna-Stürma den Ball dann ibern Dormann hehm, ging abor nur uf de Ladde. Dr Dormann vom RSL, ganz in schwarz wie dr Lew Jaschin frieher, hat dann generell o noch een zwe'e risch gudd rausgeholt; vor allm so een flachn Schuss von dr rechdn Seschzehnregge gurz vorm Ände - den habsch schon drinne gesehn. Na un uff dr annern Seide ham die Gonnewitzer o ganz scheen was lieschn gelassn. Eema kamse uf der linkn Seide mit'm 17-er durch, abor den Rickpass von dem hat dann dr 5-er was weeß ich warum uf de Riesaer Straße nausgedroschn, stadd einfach ma ins Netze. Un dann hammse ja o noch son Briddn odr n Schoddn zur Halbzeit neigewechselt - gloob‘sch zumindestns dass das eener is, weil der hat immer so komsch gepläkt, konnte eschentlich nur ä Tommy sein - na ja der iss uff jedn Fall o ema risch gudd vom grien 16-er freigespielt wordn, und wollte dann 25 m alleene vorm Dor den Ball übern Dormann lupfn. Hat aber nur ind Dregg gehaun, so dass dr Ball fleima 20 cm hogehubbelt ist. Hätter o einfach flachspieln könn, da wär dr Ball von ganz alleene heeher gehubbt. A sonst gabs ni so risch viel an Geleschnheidn - ä bissl Glick musste ja o ham, wie beim Tor, he?

K: "Wie wardn des?"

H: "Also ich gloob dr 2-er von de Gonnewitzr hadde 'nen Freistoß von dr Middellinie indn Strafraum gebocht - ich sachs ja, das iss dr eenzsche rische Fußball - na, un da hat erscht dr Tommy dn Ball mitm Kobbe vom reschdn Pfosdn uffn linkn Pfosdn niebrgeleschd, und dort haddn dann der reschde Innvorteidschr neigeköbbt - aber 's sah schon ä bissl komsch aus, was de Forduna-Loide da uff dr Dorlinie fabriziert hamm. Bloß eschentlich häddsch ja gedacht, dass dr 6-er von de Gonnewitzern - ä hibbscher Gerl war das - dass der eens macht. Den hammse abor zur Halbzeit scho nausgenommn.

K: "Und wie wars am Ende?"

H: "Na kurz vor Ultimo ham die von dr Forduna nochema alles neingeworfn. 's gab o een Herrn hier von dr Tribine, der zwischndurch ma neigeplärrt hat, dass es wo' ni sein kann, geschn diese Herde aus Gonnewitz hier zu verliern. Un ich gloobe, die Jungs in Grien warn o ziemlich ga.o. am Ende - wie der rechte Außenverteidscher von denen rumgeröscheld hadde, ich gloobe, dem gings ni so gudd. Und natierlisch 's obligatorsche Zeitschindn am Ende äm. Ham die grien Chaotn doch zum Beispiel glatt versucht, nen Einwurf gar ni ersd ins Felde nei zu werfen, sondern glei wiedr naus, weschn Wiedrholung un so. Abor ni mitm Schiri! Der hadd dann nämlisch o 4 Minudn mehr Nachspielzeid gegähm, wesweschn dr Trainr von de Gonnewitzern zum Schlusse o ganz scheen an dr Linie rumgedöbert iss. Abor 's Bibbern war dann doch o irschdwann ieberstandn.

K: "Un - kummste nochema wiedr?"

H: "Och, mir hadds gudd gefalln. Bloß dass es keene Bratwurscht hier gibd iss äm ä bissl schade. Näja, ich muss jetze heeme, 's gibt noch Gulasch von gesddrn. Tschüssikowski!"

-- Gedächtnisprotokoll von Karl mit Helmut --